isii me.n Khush huu.N meraa dukh ko_ii to sahataa hai
chalii chaluu.N ki jahaa.N tak ye saath rahataa hai
zamiin-e-dil yuu.N hii shaadaab to nahii.n ai dost
qariib me.n ko_ii dariyaa zaruur bahataa hai
na jaane kaun saa fiqraa kahaa.N raqm ho jaaye
dilo.n kaa haal bhii ab kaun kis se kahataa hai
mere badan ko namii khaa ga_ii ashko.n kii
bharii bahaar me.n jaise makaan Dahataa hai
justajuu khoye huo.n kii umr bhar karate rahe
chaa.Nd ke ham_raah ham har shab safar karate rahe
raasto.n kaa ilm thaa ham ko na simto.n kii Khabar
shahar-e-naamaaluum kii chaahat magar karate rahe
ham ne Khud se bhii chhupaayaa aur saare shahar se
tere jaane kii Khabar dar-o-divaar karate rahe
vo na aayegaa hame.n maaluum thaa us shaam bhii
intazaar us ka magar kuchh soch kar karate rahe
aaj aayaa hai hame.n bhii un u.Daano.n kaa Khayaal
jin ko tere zaum me.n be-baal-o-par karate rahe
hamaare daramiyaa.N aisaa ko_ii rishtaa nahii.n thaa
tere shaano.n pe ko_ii chhat nahii.n thii
mere zimme ko_ii aa.Ngan nahii.n thaa
ko_ii vaadaa terii zanjiir-e-paa banane nahii.n paayaa
kisii iqaraar ne merii kalaa_ii ko nahii.n thaamaa
havaa-e-dasht kii maanind
tuu aazaad thaa
raaste terii marzii ke tabe the
mujhe bhii apanii tanhaa_ii pe
dekhaa jaaye to
puuraa tasarruf thaa
magar jab aaj tuu ne
raastaa badalaa
to kuchh aisaa lagaa mujh ko
ke jaise tuu ne mujh se bevafaa_ii kii
dil kaa kyaa hai vo to chaahegaa musal_sal milanaa
vo sitam_gar bhii magar soche kisii pal milanaa
vaa.N nahii.n vaqt to ham bhii hai.n adiim-ul-fursat
us se kyaa kahiye jo har roz kahe kal milanaa
ishq kii raah ke musaafir kaa muqaddar maaluum
dasht-e-ummiid me.n andeshe kaa baadal milanaa
daaman-e-shab ko agar chaak bhii kar le.n to kahaa.N
nuur me.n Duubaa huaa subah kaa aa.Nchal milanaa
